Monday, March 21, 2011

අතීතය නැවතත් ජීවමානවනු දකිමින්...

බොහෝ හැලහැප්පීම් මැද ලංකාවට ළඟාවීමට තරම් වාසනාවන්ත වීමි...කිසිවක් කිරීමට සිත එකඟ කර ගත නොහැකි වූ නමුත් තවත් අයෙකුට මසිත තෙරපුන දුක් කරදර කීමෙන් ද කරදරයක් කිරීමටද නොසිතුන නිසා ලියා තැබූ සටහන් දෙකක් මේ...



භූ කම්පනයක සේයාවකුදු අපට නොදැනුන ද, එක්වරම සමුදුර බිහිසුණුව ගොඩබිමට ඇදෙමින් සිදුකළ මහා විනාශයක මතක තවමත් මසිතේ හොඳින්ම සටහන්ව ඇත. වාසනාවකට එදින නිවාඩු දිනක් වූයෙන් පුරුදු පරිදි පෙරදා රැයේම නිවස ද අම්මා ද සොයාගොස් සිටියෙන්, සිදුවීම කෙතරම් බිහිසුණු වුවද ඒ තත්ව යටතේ ජීවත්වීමට අවැසි කිසිදු වගකීමක් දැරීමට එදා මට සිදු නොවිණ.
එහෙත් අද නුහුරු පරිසරයක තනිව, අතීතය වඩාත් බිහිසුණු ලෙස නැවතත් ජීවමානවනු දැකීමට ද ඒ තත්ව යටතේ ජීවත්වීමට ද සිදුව ඇත. සිදුවූ භූමිකම්පාව හා බැඳුනු ද්වීතියික කම්පන තවමත් වරින්වර සිදුවේ. එවන්  භූකම්පන මින්පෙර ද සිදුවනු මා අත්විඳ ඇත. එදා ඒවා මසිත සසල කිරීමට සමත් නොවූවත් අද එසේ නොවේ. එදා මා සිතුවේම ඒවා වැඩිදියුණු නොවනු ඇති බවයි. එහෙත් අද කුඩා සෙලවීමක් පවා ඒවා වැඩිදියුණු වේයයි බියෙන් මසිත සසල කරවයි.
සැමදා භූකම්පන සිදුවන දේශයක ඉපිද හැදී වැඩුණු ජපන් ජාතිකයන් පවා මට වඩා විශාල වෙනසක් නම් නොවේ. ඇතැම්විට භූකම්පනයක බිහිසුණු බව මට වඩා හොඳින් අත්විඳ ඇති නිසාවෙන් විය හැක. තවත් භූකම්පනයක් සිදුවෙයිදෝ යන බියෙන් ඇලලී ගිය ඔවුන් ද අනතුරක සේයාවක් දකින බොහෝවිට අප කරන්නාක් මෙන් ආහාර රැස් කිරීම ට පටන්ගෙන ඇත. කිසිදා නොදුටු පරිදි වෙනදා බොහෝ ක්ෂණික ආහාර වර්ග පිරුණු කඩසාප්පුවල රාක්ක හිස්ව තිබෙනයුරු මා දුටිමි. මට අම්මා ද මගේ රට ද හදිසි අවස්ථා ද සිහිපත් කරවන්නේ ඒවා විසිනි.
අනෙක් අතින් මීට වඩා බොහෝ අවදානම් පෙදෙස්වල මිනිසුන් බොහෝ කරදර විඳිනු ඇත. ගෙවල් දොරවල් කැඩීබිඳී ගොස් කොතනක හෝ තාවකාලිකව පිළියෙළ වූ ස්ථානයක ජීවත්වන්නවුන් කොපමණක් ඇත් ද? මේ දිනවලත් මහා දවාලේත් සෙල්සියස් අංශක 10 ට අඩු සහ රාත්‍රියේ සෙල්සියස් අංශක 1 ට ඉතා ආසන්න වන ජපානයේ විදුලිය ඇනහිටීමෙන් අධික සීතලෙන් විඳින පීඩාව ද විඳීමට ඔවුන්ට සිදුව ඇති.
මිනිසාට වඩා සොබාදම බලවත් බව නැවතත් මතක් කරදෙමින් සිදුවන අනතුරු වැලක් එකිනෙක වාර්තාකරනු රූපාවාහිනියෙන් දිගින් දිගට ම ඇසේ.  වරින්වර නොයෙක් පෙදෙස්වලට තව තවත් කෙරෙන සුනාමි අනතුරු ඇඟවීම් ද, ගෑස් කාන්දුවීම් හේතුවෙන් තැන තැන ඇවිලෙන ගිනි ද, අවදානම් සීමාව ඉක්මවමින් ඉහළ යන විකිරණ මට්ටම ද, එකින් එක ක්‍රියාවිරහිත වන බව කියන න්‍යෂ්ඨික ප්‍රතික්‍රියාකාරකවල සිසිලන පද්ධති ද අතුරුදන්වූවන් ද තවත් බොහෝ දේද විසින් බියෙන් ඇලලී ගිය දේශයක වරක් මා දුටු අතීතය නැවත වරක් ජීවමානවනු දකින්නට මට බලකරයි. ලංකාවේ කොහේ හෝ සිටියා නම් මගේ සුපුරුදු ආරක්ෂක පිළිවෙත වූ ගෙදර බලාදිවීම කළ හැකි නමුත් අද ගෙදර යා නොහැකි බැවින් ගෙදර මේ ගැන නොදන්නා තරමටම කරදර අවම වේ.
12-03-2011

විදුලිය කපා හැරීමෙන් අඩපණ වූ දුම්රිය සේවාව ජපානය අවුල් ජාලයක් බවට පත්කර ඇත. විදුලිය ඇණහිටීමක් කිසිදා නොවිඳි වර්තමාන ජපන් ජනතාව බොහෝ සෙයින්ම කලබලව සිටිති. සැතපුම් ගණන් දිග ඉන්ධන පෝලිම් ද,  ආහාර රැස්කිරීම ද බැටරි, ලාම්පු, ඉටිපහන් රැස්කිරීම ද ඇතුළු බොහෝ දේ විසින් අවුල් කරන ලද ජපානයේ සිට සිත එකඟ කරගෙන කිසිවක් කළ නොහැකි නිසාවෙන්ම මට දැනෙන්නේ මෙහි රැඳී සිටීමේ අපහසුවකි.  හෙට දවස පිළිබඳ අවිනිශ්චිතතාව විසින් උපදවන හැඟීම් රැසකින් ඔද්දල් වූ සිත වරින් වර කළඹවන්නේ තවමත් සිදුවෙන ද්වීතියික කම්පන විසිනි. මේ සියරට නොවන බැවින් බොහෝවිට සිදුවන අයුරින් ගෙදර බලායාමේ උවමනාව මසිත දවයි.
14-03-2011





Friday, March 11, 2011

බිහිසුණු ජපන් භූමිකම්පාව අත් වින්දෙමි...

ජපානයේ වාර්තාගත් ඉහළම විශාලත්වයෙන් යුතු භූමි කම්පාව අද ජපානය අත්වින්දා... රික්ටර් මාපාංක 8.9 ක (වසර 140 කට පෙර වාර්තා තැබීම ඇරඹුමෙන් පසු...) ජපානෙ වෙලාවෙන් හවස 2.46 ට, ටෝක්යෝවට කිලෝමීටර් 230 ක් දුරින් මුහුදේ... අතිවිශාල සුනාමියක් ජපානෙ නැගෙනහිර වෙරළේ ඇතිවෙලා... තවත් දවසක් ජීවත් වීමේ ආශාවෙන් පිරුණු මිනිස්සු කීදෙනෙක් බිලිගන්න ඇති ද?

මම ඉන්නෙ තට්ටු 10 ක ගොඩනැගිල්ලක 9 වෙනි තට්ටුවෙ...
නිතරම පොඩි පොඩි භූමි කම්පා ඇතිවෙන නිසාම දැන් භූමි කම්පාවලට අපි පුරුදු වෙලා... මීට දවස් කීපෙකට කලින් ඇතිවුණ භූමි කම්පාවත් ටෝක්යෝවට දැනුන...ඒත් ලොකුවටම නෙවෙයි...ඒ නිසා අදත් භූමි කම්පාවක ඇරඹුම දැනුනත් පුරුදු විදියටම ඉන්න තැන හිටියා මිස එළියට ගියේ නෑ කවුරුත්ම...ඒත් එන්න එන්නම ගොඩනැගිල්ල සෙලවීමේ වේගය වැඩිකරමින් භූමි කම්පාව දරුණු වුණා... කල්පයක් වගේ දැනුන විනාඩි ගණනාවක්ම ගත වෙද්දි, මේසෙ උඩ තියෙන දේවල් එකිනෙක බිමට වැටෙද්දි... ඇවිදගෙන එලියට යන්නත් බැරිතරම් වේගයෙන් සෙලවෙන ගොඩනැගිල්ලෙ එකේක තැනින එක එක දේවල් බිම වැටෙන සද්දයි, උඩ තියෙන ලයිට්, AC අවුට්ලට්ස් හෙලවෙන සද්දයි එක්ක මට හිතුනෙම ඒව මගෙ ඔලුවට වැටෙයි කියල...
මේසයක් යටට රිංගගන්න තරම්වත් සිහියක් මට ආවෙ නෑ...වෙන දෙයක් බලා ඉන්නව ඇරෙන්න කරන්න කිසිවක්ම නැති නිසා බයක් දැනුනෙත් නෑ... විසිවෙලා යන එක වළක්වා ගන්න බිමින් ඉඳගෙන කම්පනය ඉවර වෙනතුරු ඔහේ බලාගෙන ඉන්නව ඇරෙන්න...
විශාලම කම්පනය ඉවර වුණාට පස්සෙ ගොඩනැගිල්ලෙන් බිමට බැහැල තවත් සෑහෙන වෙලාවක් එලියට වෙලා හිටිය...ඒ අතරේදි තවත් පොඩි පොඩි කම්පන රාශියක් සිද්ද වුණා...  දුරකතන සංඥා සියල්ල ඇණහිටියා... කිසිම ආකාරයක සංනිවේදනයකිනුත් තොරව ගතවී ගිය පැය කිහිපයකට පස්සෙ ආයෙම සියල්ල කෙමෙන් යථා තත්වයට හැරෙමින් පවතිනවා...තවමත් ගමනාගමනය යථා තත්වයට පත්වෙලා නෑ ඒත්...
ඒත් බොහෝ ප්‍රදේශවලට විදුලිබල ඇණහිටීම්... ගින්න... සුනාමි ආදී බොහෝ ව්‍යසන මැද්දෙන්...
තවමත් දැනෙන තරමේ සෙලවීම් සිදුවෙනවා වරින්වර...
ජපානයෙන් පිටත තවත් බොහෝ රටවලටත් සුනාමි අනතුරු ඇඟවීම් නිකුත් කරල...වරක් මගේ රටේ අපේම මිනිසුන් බිලිගත් සුනාමියක බිහිසුණු බව අත්විඳි නිසාම එහි වේදනාව තදින්ම හිතට දැනෙනව... මිනිසුන්ගේ තවත් දවසක් ජීවත්වීමේ පරම පැතුම උදුරගන්න නම් එපා... ඒ මගෙ පැතුම...


Tuesday, March 8, 2011

ජපන් කෑම...(Sushi, Sashimi and Seafood)

අමුවෙන් මාළු ආහාරයට ගැනීම ගැන ජපානෙට තියෙන්නෙ ලොකු ප්‍රසිද්ධියක්... අමුවෙන් මාළු ආහාරයට ගැනීමට පිළියෙල කරන විදි දෙකක් තමා සුශි, සශිමි කියන්නෙ...
උයපු බත් උඩින් මාළු තියල හරි, මාළු මැදිකරල රෝල්ස් වගෙ ඔතල හරි තමා සුෂි පිළියෙළ කරන්නෙ...අමුවෙන් තුනීවට කපපු අලුත් මාළු පෙති බත් ගුලියක් උඩින් තිබ්බ වගෙ තමා මේක... මාළු බිත්තර ටිකක් බත්වලට උඩින් තියල නොරි කොළේක ඔතල හදපු සුෂි තමා මේ...


 සෂිමි කියන්නෙ අමු මාළුවලින් විතරක් පිළියෙළ කරන කෑමකට...සමහර වෙලාවට, සලාද කොළ, ගාගත් රාබු, කපාපු ලූනු එක්ක මේක ලස්සන දීසියක් විදියට හදනව...


මේ දෙකටම ගන්න මාළු වර්ග සමානයි...
ටූනා වර්ග, සැමන් මාළු වර්ග, ඉස්සො, බූවල්ලො වගෙම මාළු බිත්තරත් මේවලට ගන්නව...වම් අත පැත්තෙ අයිනෙ රතුපාට දාරයක් එක්ක සුදුපාටට තියෙන්නෙ බූවල්ලා මාළුවෙක්ගෙන් කපාගත්ත තීරු...
තුනීවට කපපු නිසාත් අළුත් මාළු නිසාත් වෙන්න ඇති අමුයි කියල හිතෙන්නෑ මේක කද්දි...මුලදිම ටිකක් අපහසුවක් දැනුනත්...

අනිත් අතින් මේක නිකන්ම කන්නෙත් නෑ...සෝයා සෝස්වල දියකරපු වසබිත් එක්ක තමා සුශිත් සෂිමිත් දෙකම කන්නෙ...වසබි කියන්නෙ වසබි ගහක (Wasabia japonica) අල තුනීවට ගාල අරගත්ත පේස්ට් එකකට...ඒකෙ සැර මිරිස් සැරට වඩා හුඟක් කිට්ටු අබ සැරට... නොදන්නාකමින් ඕනවට වඩා වසබි කැවුණොත් නාහෙත් ඉස්මොළෙත් දනව වගෙ ගතියක් දැනෙන්නෙ...


මේව ඇරුණම බෙල්ලො වර්ගත් ගොඩාක් ජපන් ආහාර අතරෙ තියනව... හුඟක්ම බෙල්ලො වර්ග සුප්වලට ගන්නව... ඒ ඇරුණම වෙනම කන්නත් ගන්නව, තම්බල සෝස් දාල...ඒත් ජපන් කෑම අතරෙ මේ බෙල්ලො ආහාරයට ගැනීම ගැන මට තියෙන්නෙ ඉතාම සුළු අත්දැකීමක් විතරයි... බෙල්ලො ආහාරයට ගන්න මගෙ කිසිම කැමැත්තක් නැති නිසා...
මේ ඇර මුහුදු පැළෑටි සලාද වර්ගත් ජපන් කෑම අතරෙ විශේෂයි...මම හිතන විදියට ඒව යන්තමට හරි තම්බල අරගෙනයි තියෙන්නෙ... ජපානෙ තියෙන නානාවිධ සෝස් වර්ගත් එක්ක ඒව කන්න පුළුවන්... මුහුදු පැළෑටිවලට නම් මෙලෝ රහක් නෑ...නිකන්ම වතුර රහයි ඒව...
මේ මුහුදු පැළෑටි අඹරපු තලත් එක්ක මිශ්‍ර කරල සලාදයක් විදියට හදනව... මේ ඒකක්.. කොහොමටත් ගොඩක් කොළ වර්ග තලත් එක්ක මිශ්‍ර කරල හදපු සලාද ජපානෙ තියනව...

 

මීට අමතරව මිසො සුප් කියන බොහෝ විට ඕනෑම ආහාර වේලකට එකතුවෙන සුප් වර්ගය හදන්නත් මුහුදුපැළෑටි වගෙම බෙල්ලො, සහ මාළුවලින් ගත්ත සාරය පාවිච්චි කරනව...

Friday, March 4, 2011

Life in water...

ජලජ පැළෑටි...
ලන්කාවෙ ඉන්දෙදි වැඩිය දකින්න, අල්ලන්න නොලැබුන ජාතියක්...බොල්ගොඩ ගඟේ වැවෙන තඩි ජපන් ජබර ගස් එහෙම ඇරුණකොට... ගෙදර යද්දි නෙළුම් විලක් දකින්න ලැබුණත් ඒකට බහින්න ලැබෙන්නෙ නෑ...පුංචිම කාලෙ එකම එක සැරයක් ගෙදර අයට හොරෙන් ඒකට බැහැල පොඩි කුමුදු මලක් කඩා ගනිද්දි කටුවක් ඇනිල තුවාල වෙලා ගෙදරටත් ආරංචි වුණ නිසා ඒකට බහින්න බයයිත් එක්ක...
ඒත් ජපානෙට ආවම නම් ජලජ පැළෑටි දකින්න ලැබුන වගෙම, වවන්න, බලාකියාගන්නත් සිද්ද උණා...
ඒව වවන එකත් එක අතකින් සතුටක්, අනිත් අතින් වගකීමක්... කොහොමටත් පැල වවද්දි ඒව තමන්ගෙ වරදින් නොහොයන නොබලන නිසා මැරුනොත් දුක හිතෙනව...ඒ හින්ද වතුර හිඳෙන්න නොදී ඒව බලාගන්න ඕනෙ...
වතුරෙ හැදෙන ගස් වතුරෙ රඳන ප්‍රධාන විදි තුනක්.. වතුරෙ පාවෙන, වතුරෙ ගිලෙන ඒ නැත්නම් වතුරෙන් උඩට මතුවෙන පැල විදියට... සැල්වීනියා, ඩක් වීඩ් වගෙ ඒව වතුරෙ පාවෙනව... නෙලුම්, කැට්ටේල් වගෙ ඒව පතුලට මුල් ඇදල තියෙද්දි කොළ සහ කඳ වතුරෙන් උඩ මතුවෙනව... ඉලෝඩියා, වැලිස්නේරියා වගෙ ඒව සම්පූර්ණයෙන්ම වතුර යට හැදෙනව...හුඟක් වෙලාවට අපි මාළු ටැංකිවලට ගන්නෙ සම්පූර්ණයෙන්ම වතුරෙ යට හැදෙන පැල...
ජලජ පැළෑටි අතරින් මම හුඟක් ම ආසාවෙන් බලාගත්ත ජාතියක්... ඇල්ගී... මම ඉස්සරවෙලාම හදාගත්තෙ ඒව නිසා...අනික ඒව හදාගන්න අමාරුත් නිසා... ඇල්ගී කිව්වට ඒව පෙනුමෙන් අනිත් පැල වගේ...Characeae පවුලට අයත්...


ඒත් මුලින්ම ලංකාවෙන් හොයාගත්ත නිසා Chara zeylanica කියන නම ලැබුන විශේෂය මම දැකල නෑ...

ඒ ඇරුණම Egeria densa, Vallisneria වගෙ ලස්සන පැල වර්ග මා ගාව තියනව... හුඟක් ම මාළු ටැංකිවලට දාන ගස් ඒව...

මාංශ භක්ශක ජලජ පැළෑටි තියනව කියල ඒත් මේ මෑතක් වෙන තුරුම මම දැනගෙන හිටියෙ නෑ... ඒකත් දවසක් වෙන දේවල් හොයද්දි මට අහම්බෙන් අහුවෙච්ච දෙයක්...ඒත් දැක්ක වෙලෙම ඒක මතකෙට එකතු කළා පස්සෙ වෙලාවක හොඳට හොයන්න...

Aldrovanda vesiculosa - මේ එයින් එකක්...
ආසියාව, අප්‍රිකාව, යුරෝපය හා ඔස්ට්‍රේලියාවට ආවේණික උනත් දුර්ලභ පැළෑටියක්...
Venus fly trap වගෙම වැහෙන උගුලක් ඒකටත් තියනව...



 Utricularia australis - ඒ තවත් එකක්... ඕකිඩ් මලකට හුරු ලස්සන මලක් පිපෙනව... ඒත් ඉඩක් ලැබුණම ඉස්ගෙඩියො, මදුරු කීටයොව එහෙමත් අල්ලගෙන කනව...ශාක රාජධානියේ ආශ්චර්යමත් නිමවුමක් විදියට සැලකෙන මේ පැළෑටියෙ තියන උගුලට අහුවුණාම...









ඒත් ජල දූෂණය එහෙමත් නැත්නම් වතුරට නයිට්‍රජන්, පොස්පරස් බොහෝ සෙයින් එක්වීම (Eutrophication) නිසා, ජලයේ ජීවත්වන මේ ශාක හා සත්ව විශේෂත් ක්‍රමයෙන් අවදානමට ලක් වෙලා... ඒ වෙනුවට ජීවයට විෂ සහිත දේ මුදාහරින, ජලය පානයට නුසුදුසු කරවන ජීව විශේෂවල ගහණය වැඩිවෙමින්...


Tuesday, March 1, 2011

ජපන් කෑම... (Soba, Udon and Tempura)

ජපන් කෑම අතරෙ නූඩ්ල්ස් වර්ග ගණනාවක් තියනව... ලංකාවෙත් තියෙන ක්ෂණික නූඩ්ල්ස් වර්ග, ස්ගැගටි, මැකරෝනි ඇරුණම ඉතිරිවෙන නූඩ්ල්ස් වර්ග තමා, සොබා සහ උදොන්...උදොන් කියන්නෙ ජපානෙ තියන ටිකක් මහත නූඩ්ල්ස් වර්ගයක්... සොබා නම් සාමාන්‍ය ප්‍රමාණෙ නූඩ්ල්ස් වර්ගයක්...


සොබා වර්ගත් කීපයක් ම තියනව... ඒ වගෙම ඒව වියළි නූඩ්ල්ස් විදියට වගෙම...තම්බල වතුර ඇරල ගත්ත තෙත් නූඩ්ල්ස් විදියට... එහෙම නැත්නම් තම්බල ෆ්‍රීස්z කළ නූඩ්ලස් විදියට විකුණන්න තියනව... උණුවතුර ටිකකට දාල හරි, මයික්‍රොවේව් කරල හරි අරගෙන කන්න පුළුවන් වෙන්න...ගෙදර ගෙනත් හදනව නම්...

සොබා හදන එක විදියක් තමයි යකි සොබා කියන්නෙ...මේ විදියට හදපු සොබා වියළිවට තියෙන්නෙ... අපි තෙම්පරාදු කරල නූඩ්ල්ස් හදනවට සමානයි...ගොඩක් වෙලාවට සකුරා මල් බලන්න ගියාම, ගිම්හාන මල්වෙඩි සංදර්ශන තියෙන තැන්වල, මේ විදියට හදපු යකි සොබා විකුණන පුංචි කඩ තියනව... යකි සොබාවලට දාන්නෙ ගෝවා... ආයෙ මුංඇට පැලවෙලා එද්දි එන පැල වගේ ජාතියක්...මෙහේ මොයශි කියනව ඒවට...සහ ඌරුමස් තමයි හුඟක් වෙලාවට...ඒත් කැරට්, ලූනු එහෙමත් දානව... ඒකට දාන සෝස් පැකට් එක තියෙන්නෙත් පව්ඩර් එකක් විදියට...ඒක කුරුඳුයි සීනියි මිශ්‍ර වෙච්ච මිශ්‍රණයක් සුවඳයි... ඒ රසයි... ඒත් ඒක දාල ඉව්වම සොබාවලින් එන්නෙ ලුණු රසක් විතරයි...හදල ඉවර වෙලා ඒක දෙද්දි රෝස පාට ඉඟුරු කෑලි ටිකකුත් උඩින් තියල දෙනව...

උඩ පින්තූරෙ තියෙන්නෙ යකි සොබා...
ඒ ඇරුණම කඩේකින් සොබා හරි උදොන් හරි කන්න ගන්නව නම් උණුවෙන් වගෙම සීතලට දෙවිදියට ම කන්න ගන්න පුළුවන්... උණුවෙන් කන්න ගන්නව නම් උණුවතුරයි සෝසුයි, නූඩ්ල්සුයි දාපු ලොකු කෝප්පයකට... සීතලට කනව නම් සෝස් වෙනම ගෙනත් දෙනව පොඩි කෝප්පෙකට, නූඩ්ල්ස් අයිස්වලට දාල තියල සීතල ක‍රල ගෙනත් දෙනව... විශේෂයෙන්ම ගිම්හාන කාලෙදි සීතලට නූඩ්ල්ස් කන්න ජපන් ජාතිකයො කැමතියි...මේ සෝස්වර්ගය ට්සුයු (Tsuyu), ඒක සෝයාසෝස් සහ මාළු ස්ටොක් එකක මිශ්‍රණයක්...ඊට පස්සෙ පොඩිවට කපපු ලූනුකොළ... තවත් මේක උඩට එකතුකරන එකේක ජාති ගොඩක් තිබුණත් ප්‍රධාන වශයෙන් සොබාවලට එකතු කරන්නෙ ඔය දේවල්... 

මේ තියෙන්න අපි සීතලට සොබා කන්න හිතුවොත් ලැබෙන විදිය... සොබා නූඩ්ල්ස් ටික ටික අරන් අර කෝප්පෙ තියෙන සෝස් එකට දාල අරගෙන කන්න ඕනෙ...

මේ පින්තූරෙ තියෙන්න අපි උණුවෙන් කන්න ගත්තොත් ලැබෙන උදොන් කෝප්පයක්...ලූනු කොළත් කපල දාල සෝසුත් දාල...

උදොන් සහ සොබා එක්ක ගොඩක් වෙලාවට කන්න ගන්න දෙයක් තමයි තෙම්පුරා කියන්නෙ... පොඩිවට කපාගත්තු එළවලු මිශ්‍රණයක් හරි, ඉස්සො, මාළු වගෙම එළවලු අතරින් බතල, නෙළුම් අල, බර්ඩොක් අල, කැරට්, වට්ටක්කා, ලූණු, හතු... වගේ හැම දෙයකින්ම තෙම්පුරා හදනව... තෙම්පුරා හදන්නෙ මේ එළවළු, පිටි මිශ්‍රණයක ගිල්ලවල බැදල... සෝයා සෝස් එක්ක තෙම්පුරා කන්නෙ... සෝයා සෝස්වල ලුණු රස වගෙ සැර රසත් එකතු වුණාම තෙම්පුරා රසයි... ජපන් කෑම අතරෙ තෙම්පුරාත් මම කන්න හුරුවුණ කෑමක්... පැත්තකින් පොඩි සෝයා සෝස් භාජනේකුත් එක්ක මේ තියෙන්නෙ තෙම්පුරා... ඒත් නරකම දේ මේ බැදපු තෙම්පුරා සමහර වෙලාවට අර උදොන් භාජනේ උඩින් පෙඟෙන්න තියල දෙන එක... මම හිතන්නෙ මම ඒක එපා කියන්න දන්නෙ නැති නිසා වෙන්න ඇති එහෙම වෙන්නෙ...